المقالة دى كانت جزء من نقاش ليا مع شخص على الإنترنت حول التاريخ و أنا حبيت أنقلها هنا للقراء على الموقع .
- على فكرة أنا عندى الجرايد القديمة بتاعة زمان - الجرايد المصرية و اللى كانت بتصدر فى مصر - زى جريدة المصرى و اللى كانت أكتر جردية بتوزع فى الوقت ده و كانت هى الجريدة الأولى فى مصر و غيرها , و إذا عندك استعداد نتناقش فى التاريخ بطريقة موضوعية ممكن نتناقش بالوثائق و الكلام الرسمى و الموثق , إنما لغة الشعارات و الكلام اللى فى الهواء ده حاجة انتهت و ماعادتش موجودة فى العالم و اى حاجة ممكن أقولها ليك ليها مصدر ثابت تاريخيا , و أحب أقول لحضرتك أساسا إن الإنقلاب بتاع 52 ده و حركة الظباط الاحرار دى أساسا اللى أسسها أساسا ظابط فى الجيش اسمه محمود لبيب عشان تبقى امتداد طبيعى للتنظيم السرى بتاع الإخوان داخل الجيش , و عبد الناصر و كتير من الظباط الاحرار كانوا اعضاء فى الإخوان لكن بعد كدة اختلفوا على الحكم و السلطة و على فكرة كمان محمد نجيب ده كان راجل محترم جدا و كان ليه شعبية فى الشارع حتى قبل 52 و خصوصا من أيام حرب فلسطين لأنه عمل بطولات و حارب و هوا متصاب و كان معروف للشعب بسبب الحرب و مش حقيقى اللى اتقال عنه انه كان راجل خيال مآتة و هما جابوه لا, ده كان معروف جدا للشارع المصرى و خصوصا بسبب ازمة نادى الظباط الملكى اللى عملت منه شخصية وطني بيتحدى الملك , و سبب الخلاف بين محمد نجيب و باقى المجموعة إن محمد نجيب اختلف معاهم على إن الجيش يحكم لأنه كان شايف إن الجيش المفروض يرجع الثكنات بتاعته ,إلا إن باقى المجموعة كانت طمعانة فى الحكم و عايزة تسيطر على الحكم و سبب تانى للخلاف إنهم كانوا عاوزين يحاكموا مصطفى النحاس بتهمة الفساد السياسى على الرغم من إن مصطفى النحاس - من خلال معاهدة 36 - اللى زودت عدد قوات الجيش المصرى و بالتالى أتاحت الفرصة لأبناء كتير من الشعب المصرى إنهم يدخوا الجيش و يخدموا بلدهم - رغم كدة كانوا عايزين يحاكموه !!!!!, و خلى بالك كل الظباط اللى كانوا اعضاء فى التنظيم - باستثناء محمد نجيب - كلهم دخلوا الكلية الحربية بعد سنة 36 يعنى دخلوا بسبب المعاهدة اللى عملها النحاس و بعد كدة عايزين يحاكموه , إنت بقى تسمى ده إيه؟؟؟؟؟!!!!!
الكاتب السياسى
أحمد غانم